Vídeo sira: Espasu

Kompetisaun Tour de Timor halo sisklista sira ba dahuluk hakat fronteira Timor-Leste - Indonézia

Timor-Leste nia dinamizmu hodi kria espasu seguru bele haree liuhosi ezemplu Tour de Timor nian. Tinan ida dala ida, siklista timoroan no internasionál sira sa'e bisikleta hodi halai-taru ho seguransa liu husi fatin dook liu iha foho iha rai-laran, no ema-foho simu sira ho entuziazmu no apoia sira. Tour de Timor internasionál 2012 nian lori siklista ba dala uluk hakat liu fronteira entre Timor-Leste no Indonézia. Sira liu husi territóriu indonéziu iha Timór Loromonu to'o Timor-Leste nia enklave Oekusi no fila fali. Akontesimentu signifikativu ida-ne'e hatudu kooperasaun ne'ebé hetok di'ak liu entre Timor-Leste no Indonézia.

Komandante Jerál Polísia Nasionál Timor-Leste dehan nia ekipa prontu hasoru dezafiu iha futuru

Longuinhos Monteiro, Komandante Jerál Polísia Nasionál Timor-Leste nian (PNTL), hanoin katak polísia sira nu'udar protetór seguransa nian iha Estadu demokrátiku ida. Iha 27 Marsu 2011 PNTL kaer filafali responsabilidade hodi hala'o, komanda no kontrola operasaun polísia nian. Monteiro dehan katak nia laran-metin ba PNTL nia abilidade hodi kumpre ninia papél no hasoru dezafiu sira iha futuru, no temi espíritu "Hamutuk, ita bele." ne'ebé sai hanesan matadalan ba sira-nia serbisu.

Komisáriu Polísia ONU dehan Polísia Nasionál Timor-Leste haka'as an serbí sidadaun tomak

Parte sentrál ida husi UNMIT nia mandatu maka atu ajuda dezenvolve kapasidade Polísia Nasionál Timor-Leste nian (PNTL). Iha 27 Marsu 2011 PNTL kaer filafali responsabilidade hodi hala'o, komanda no kontrola operasaun polísia nian. Komisáriu Polísia ONU nian Luís Carrilho ko'alia kona-ba oinsá maka PNTL nakfila an tiha ona hodi sai forsa kredivel ida.

Timor-Leste nia forsa seguransa sira agora proteje nasaun nia rekursu importante oioin

Proteje seguransa nasionál iha nasaun ida ne'ebé iha liña-kosta ho kilómetru 700 resin, dala barak iha área dook no fuik, ne'e knaar todan ida. Eric Brandenburg, Xefe no Asesór Espesiál iha UNMIT nia Unidade Apoiu ba Setór Seguransa ko'alia kona-ba oinsá maka Polísia Nasionál Timor-Leste (PNTL) no Forsa Defeza Timor-Leste (FFDTL) halo daudaun ida-ne'e duni, bele liuhosi luta kontra krime tranznationál hanesan peska ilegál ka proteje rekursu sira hanesan nasaun nia depózitu petróleu no gás ne'ebé boot. Nia deskreve oinsá maka polítika nasionál seguransa nian globál tenke lidera no apoia polítika importante seluseluk.

Polísia Nasionál Timor-Leste nian kaer filafali responsabilidade primária iha rai-laran

UNMIT no Polísia ONU serbisu metin ho Governu Timor-Leste nian hodi harii filafali forsa polísia nasaun nian liutiha lei no orden naksobu iha 2006. Iha 27 Marsu 2011 Polísia Nasionál Timor-Leste nian (PNTL) kaer filafali responsabilidade hodi hala'o, komanda no kontrola operasaun polísia nian. Eventu ne'e marka ho serimónia ida iha Palásiu Governu iha kapitál Dili. Membru sira husi ONU no PNTL ko'alia kona-ba signifikadu husi transferénsia responsabilidade husi UNPOL ba PNTL no esplika papél ne'ebé muda ba forsa rua ne'e.

Bombeiru sira Timor-Leste nian hala'o sira-nia serbisu

Bombeiru sira ohin loron nian la hamate ahi de'it. Sira hala'o misaun rezgate bainhira aviaun monu ka akontese asidente ho veíkulu. Sira tula vítima ba ospitál no fó asisténsia ba komunidade sira ne'ebé presiza halo evakuasaun husi sira-nia área. Sira mós hanorin adultu no labarik sira kona-ba prevene ahi no oinsá maka ita bele halai husi ahi boot bainhira akontese. Ekipa Korpu Bombeiru iha Dili fahe ba brigada haat, ida-idak ho membru na'in-15. Liutiha simu formasaun no apoiu husi Nasoins Unidas no Australian Firefighters International, Dili nia bombeiru sira prontu atu fornese asisténsia emerjénsia loron-kalan la para.

Kampaña polisiamentu komunitáriu, anúnsiu servisu públiku nian iha 2010

Polísia Nasionál Timor-Leste nian hili modelu polísia komunitária hodi fó biban ba sira atu hakbesik ba povu hodi harii ambiente seguru iha dame nia laran. Vídeo ne'e parte husi kampaña luan tan hodi promove papél polísia komunitária nian iha Timor-Leste.